အသုံးပြုမှုများသည့် ကုန်သေတ္တာအမျိုးအစား ၁၆ မျိုး ✅ (16 Common types of containers) ✅

ယခုအခါ ကုန်သေတ္တာများ(Containers)သည် ပင်လယ်ရေကြောင်းသယ်ယူပို့ဆောင်ရေး၊ ကုန်သွယ်ရေးနှင့်အခြားသယ်ယူပို့ဆောင်ရေး ကဏ္ဍအသီးသီးတွင် မရှိမဖြစ်အရေးပါသည့် အစိတ်အပိုင်းတစ်ရပ်အဖြစ် ပါဝင်နေကြပြီဖြစ်သည်။ ကမ္ဘာ့တစ်နေရာမှ အခြားတစ်နေရာသို့ အမျိုးမျိုးအစားစားသောကုန်စည်ပစ္စည်းများကို သယ်ယူပို့ဆောင်ရာတွင် ကုန်သေတ္တာများကို တွင်ကျယ်စွာအသုံးပြုလျက်ရှိကြသည်။ သယ်ယူပို့ဆောင်မည့်ကုန်ပစ္စည်းအမျိုးအစား၊ သဘာဝပေါ်မူတည်၍ ကုန်သေတ္တာများသည်လည်း အရွယ်အစား၊ ဖွဲ့စည်းပုံ၊ တည်ဆောက်ရာတွင်အသုံးပြုသည့်ပစ္စည်း၊ တည်ဆောက်မှုနည်းစနစ်စသည်ဖြင့် အမျိုးမျိုးကွဲပြားခြားနားလျက်ရှိသည်။

လက်ရှိအသုံးပြုနေကြသည့် သုံးစွဲမှုများသော ကုန်သေတ္တာအမျိုးအစားအချို့ကို ဖော်ပြလိုက်ပါသည် …….

✅ (၁) Dry storage cargo container (ခြောက်သွေ့ကုန်စည်ပို့ဆောင်ကုန်သေတ္တာ)
==============================================
ခြောက်သွေ့သောကုန်ပစ္စည်းအမျိုးမျိုးကို ထည့်သွင်းသယ်ဆောင်ရာတွင် အသုံးပြုကြသည်။ အဆိုပါကုန်သေတ္တာအမျိုးအစားမှာ အများဆုံးအသုံးပြုသည့် ကုန်သေတ္တာအမျိုးအစားဖြစ်ပြီး Standard container အဖြစ်လူသိများသည်။လေလုံ၊ ရေလုံနှင့် ကုန်စည်တန်ဖိုးပေါ်မူတည်၍ အဆင့်အတန်းအမျိုးမျိုး ခွဲခြားထားသည့်ပြင် အရွယ်အစားအရလည်း ၈ပေ x ၁၀ပေ၊ ၈ပေ x ၂၀ပေ နှင့် ၈ပေ x ၄၀ပေ စသည်ဖြင့် အမျိုးမျိုးအစားစားရှိသည်။

✅ (၂) Flat Rack container (ပစ္စည်းတင်စင်ကုန်သေတ္တာ)
==============================
Dry storage cargo container များနှင့်အလားတူ ကုန်သေတ္တာမျိုးပင်ဖြစ်သည်။ သို့ရာတွင် ကုန်သေတ္တာဘေးနံရံများကို ခေါက်သွင်းနိုင်သည့်ပြင် အမိုးမပါရှိသည့်အတွက် ပစ္စည်းတင်စင်ကဲ့သို့ ပုံစံပြောင်းနိုင်သဖြင့် Flat Rack container ဟုခေါ်ဆိုခြင်းဖြစ်သည်။ဆောက်လုပ်ရေးလုပ်ငန်းသုံးပစ္စည်းများကဲ့သို့ လေးလံသောကုန်ပစ္စည်းများကို သယ်ဆောင်ရန်အသုံးပြုကြသည်။

✅ (၃) Open top container (အမိုးဖွင့်ကုန်သေတ္တာ)
===========================
အဆိုပါကုန်သေတ္တာအမျိုးအစားတွင် ဖွင့်နိုင်သည့်အမိုးပါရှိပြီး ၎င်းအမိုးကိုဖြုတ်ချထားနိုင်သည်။
သို့ဖြစ်၍ ကုန်သေတ္တာအမြင့်ထက်ကျော်လွန်သော ကုန်စည်ပစ္စည်းများကို ထည့်သွင်းသယ်ယူပို့ဆောင်နိုင်သည်။

✅ (၄) Tunnel container (ဥမင်လှိုဏ်ခေါင်းကုန်သေတ္တာ)
===============================
အဆိုပါကုန်သေတ္တာအမျိုးအစားမှာ ကုန်သေတ္တာရှေ့၊နောက် ထိပ်နှစ်ဖက်တွင် တံခါးများပါရှိသဖြင့် ကုန်ပစ္စည်းများအတင်အချပြုလုပ်ရာတွင် လွယ်ကူလျင်မြန်စေနိုင်သည်။

✅ (၅) Open side storage container (ဘေးဖွင့်ကုန်သေတ္တာ)
=================================
အဆိုပါကုန်သေတ္တာအမျိုးအစားတွင် ကုန်သေတ္တာဘေးနံရံတစ်ဖက်တွင် တံခါးများတပ်ဆင်ထားပြီး ဘေးနံရံတစ်ခုလုံးဖွင့်နိုင်အောင် စီစဉ်ထားရှိသည်။ အရွယ်အစားကြီးမားသည့် ကုန်ပစ္စည်းများ ထည့်သွင်းတင်ဆောင်သည့်အခါ လိုသလိုအဖွင့်အပိတ်ပြုလုပ်ပေးနိုင်သည်။

✅ (၆) Double doors cargo container (တံခါးနှစ်ထပ်ကုန်သေတ္တာ)
===================================
အဆိုပါကုန်သေတ္တာအမျိုးအစားမှာ တံခါးနှစ်မျိုးတပ်ဆင်ထားသည်။ ကုန်သေတ္တာဘေးနံရံတစ်ဖက်တွင် တံခါးတပ်ဆင်ထားသည့်အပြင် ကုန်သေတ္တာထိပ်ဖက်တွင်ပါ တံခါးတပ်ဆင်ထားသည်။ သံမဏိချောင်း၊ သံချောင်းစသည့် ဆောက်လုပ်ရေးသုံးကုန်ပစ္စည်းများ သယ်ဆောင်ရာတွင်အသုံးပြုကြသည်။

✅ (၇) Refrigerated ISO container (ISO အသိအမှတ်ပြုအအေးခန်းကုန်သေတ္တာ)
=============================================
အဆိုပါကုန်သေတ္တာအမျိုးအစားမှာ ပြင်ပရာသီဥတုဒဏ်ကြောင့် ကုန်သေတ္တာအတွင်း အပူချိန်မြင့်မတက်လာစေရန် ထိန်းညှိပေးထားသောစနစ်ပါရှိသည်။ ခရီးရှည်ပို့ဆောင်ရမည့် အသား၊ ငါး၊ သစ်သီး၊ ဟင်းသီးဟင်းရွက်ကဲ့သို့ ပုတ်သိုးလွယ်ကုန်ပစ္စည်းများ သယ်ယူပို့ဆောင်ရာတွင် အသုံးပြုကြသည်။

✅ (၈) Isulated or Thermal container (အပူချိန်ထိန်းကုန်သေတ္တာ)
=====================================
အဆိုပါကုန်သေတ္တာအမျိုးအစားမှာ ပြင်ပအပူဒဏ်၊ အအေးဒဏ်တို့ကြောင့် အပူချိန်ပြောင်းလဲမှုမဖြစ်ပေါ်စေရန် သတ်မှတ်ထားသောအပူချိန်ကို ထိန်းညှိပေးထားသည့်စနစ် ပါရှိသည့်အပြင် လေဝင်လေထွက်စနစ်ပါ တပ်ဆင်ထားသည်။ ခရီးရှည်သယ်ယူပို့ဆောင်မည့် ကုန်ပစ္စည်းများအတွက် သင့်လျော်သည့်ကုန်သေတ္တာအမျိုးအစားဖြစ်သည်။

✅ (၉) Tanks (အရည်လှောင်ကန်)
===================
အရည်လှောင်ကန် (Tanks) များကို သံမဏိ(သို့မဟုတ်)အခြားဓာတုဓာတ်ပြောင်းလဲမှု မဖြစ်ပေါ်စေနိုင်သည့်သတ္တုများဖြင့် တည်ဆောက်ထားသည်။ ဓာတ်ငွေ့ရည်ကဲ့သို့ အရည်အမျိုးမျိုးကိုသယ်ဆောင်ရာတွင် အများဆုံးအသုံးပြုကြသည်။

✅ (၁၀) Cargo storage roll container (ရွှေ့ရှားနိုင်သောကုန်သေတ္တာ)
=======================================
အဆင့်ဆင့်စီထပ်နိုင်သောကုန်စည်ပစ္စည်းများ သယ်ယူပို့ဆောင်ရန် အထူးစီမံထားသည့် ကုန်သေတ္တာအမျိုးအစားဖြစ်သည်။ အဆိုပါကုန်သေတ္တာမျိုးမှာ ခိုင်ခန့်ထူထဲသောဝိုင်ယာပိုက်များဖြင့် ပြုလုပ်ထားပြီး ဒလိမ့်တုံးများတပ်ဆင်ထားသဖြင့် အလွယ်တကူပြောင်းရွေ့နိုင်သည်။

✅ (၁၁) Half Height cargo container (ထက်ဝက်အမြင့်ကုန်သေတ္တာ)
=======================================
ပုံမှန် Standard container (Dry storage cargo container) များ၏ အမြင့်ထက်ဝက်သာရှိသည့် ကုန်သေတ္တာအမျိုးအစားဖြစ်သည်။ အများအားဖြင့် သံမဏိဖြင့်တည်ဆောက်ထားပြီး ကျောက်မီးသွေး၊ လမ်းခင်းကျောက်စသည့် ကုန်ပစ္စည်းများတင်ဆောင်ရန် အထူးပြုလုပ်ထားခြင်းဖြစ်သည်။

✅ (၁၂) Car carrage cargo container (မော်တော်ယာဉ်သယ်ကုန်သေတ္တာ)
=======================================
မော်တော်ယာဉ်များသယ်ဆောင်ရန် အထူးပြုလုပ်ထားသည့် ကုန်သေတ္တာအမျိုးအစားဖြစ်သည်။အဆိုပါကုန်သေတ္တာများမှာ ဘေးနံရံကိုဖြုတ်ချထားနိုင်သဖြင့် မော်တော်ယာဉ်များ အထိအခိုက်မရှိပဲ အတင်အချပြုလုပ်န်ုင်သည့်ပြင် ကုန်သေတ္တာအတွင်း မော်တော်ယာဉ်များ ရွေ့လျားမှုမရှိ အံဝင်ခွင်ကျဖြစ်ရန် စီစဉ်ဆောင်ရွက်နိုင်သည်။

✅ (၁၃) Intermediate bulk shift container (ခရီးလမ်းတွင်လွဲပြောင်းမည့်ကုန်သေတ္တာ)
===============================================
အဆိုပါကုန်သေတ္တာအမျိုးအစားမှာ လမ်းခရီးတွင်ကြားဆိပ်ကမ်းတစ်ခုခု၌ ကုန်ချ (unloading) မည့် ကုန်စည်ပစ္စည်းများအတွက်သာ ရည်ရွယ်ထားသည့် အထူးကုန်သေတ္တာမျိုးဖြစ်သည်။ ကုန်ပစ္စည်းအမျိုးအမည်အများအပြားကို ထည့်သွင်းသယ်ဆောင်နိုင်ရန် အထူးပုံစံထုတ်ထားသည့် ကုန်သေတ္တာမျိုးဖြစ်သည်။

✅ (၁၄) Drums (စည်များ)
==============
အရည်အမျိုးမျိုးအတွက် အထူးသင့်လျော်သည့် ကုန်သေတ္တာအမျိုးအစားဖြစ်သည်။
သံမဏိ၊ သတ္တု၊ ဖိုင်ဘာ၊ ပလပ်စတစ် စသည့်ပစ္စည်းများဖြင့် ပြုလုပ်ထားပြီး ထည့်သွင်းသယ်ဆောင်မည့်ကုန်ပစ္စည်း (အရည်) ၏ သဘာဝနှင့်လိုက်လျောညီထွေမည့် အမျိုးအစားကိုရွေးချယ်အသုံးပြုနိုင်သည်။ အရွယ်အစားသေးငယ်သော်လည်း ၎င်းတို့၏ပုံသဏ္ဍာန်အရ နေရာလွတ်အများအပြားယူသည့် ကုန်သေတ္တာအမျိုးအစားဖြစ်သည်။

✅ (၁၅) Special purpose container (အထူးကုန်သေတ္တာများ)
=================================
အဆိုပါကုန်သေတ္တာအမျိုးအစားမှာ အထူးရည်ရွယ်ချက်များအရ မှာယူသည့်အတိုင်း တည်ဆောက်ထားသော အထူးကုန်သေတ္တာများဖြစ်သည်။ စစ်လက်နက်ပစ္စည်းများ၊ ခဲယမ်းမီးကျောက်များကဲ့သို့ အထူးဦးစားပေးရမည့် လုပ်ငန်းမျိုးအတွက် အများအားဖြင့်အသုံးပြုလေ့ရှိသည်။ ကုန်သေတ္တာတည်ဆောက်မှုနှင့် ပြုလုပ်မည့်ပါဝင်ပစ္စည်းများမှာ သယ်ဆောင်မည့်ကုန်စည်ပစ္စည်းနှင့် လိုက်လျောညီထွေဖြစ်စေရန် အထူးသဖြင့်လုံခြုံရေးကို ထိပ်တန်းဦးစားပေးအဖြစ်သတ်မှတ်ကာ စီမံဆောင်ရွက်ထားသည်။

✅ (၁၆) Swap bodies (ပုံစံပြောင်းလဲနိုင်သောကုန်သေတ္တာ)
=================================
ဥရောပတွင်အသုံးများသည့် အထူးကုန်သေတ္တာအမျိုးအစားဖြစ်သည်။
ခိုင်မာသည့်ကြမ်းခင်းနှင့် ပြောင်းလဲလွယ်သည့်အမိုးပါရှိပြီး ပစ္စည်းအမျိုးအစားစုံ ထည့်သွင်းသယ်ဆောင်ရာတွင် အသုံးပြုနိုင်သည်။ ISO စံသတ်မှတ်ချက်များနှင့်အညီ ပြုလုပ်ထားခြင်းမရှိသော်လည်း အထူးအသုံးဝင်သည့် ကုန်သေတ္တာအမျိုးအစားဖြစ်သည်။

#SuperLight #Logistics #16_commom_types_of_container